新年派利市的6個學問　點解我要派大利市畀保安員？

新年到，嫻姐先祝各位新年快樂、身體健康！講起新年，嫻姐最頭痕莫過於派利市，莫說荷包大出血，仲要注意有無派漏，人情做得足唔足，簡直是博大精深的學問。

以下是嫻姐多年派利市的總結出的經驗：

1. 咪用過期利市封

利市封講到尾是張紅紙，款式毋須過於花巧，政府亦大力提倡循環使用新淨利市封，為地球伯伯出分力。嫻姐近年都會將皇帝仔的利市封循環重用，但會選擇性使用，除了太舊破爛不用外，最重要是避免使用過期的利市封。

何謂過期利市封，簡單而言，就係今年猴年，咪用印有羊年、龍年、蛇年等圖案，被人發現真係失禮死人。

2. 金額要一視同仁

晚輩新年逗利市攞個意頭，相信懂事的人都唔會計較金額多寡，金額隨經濟條件而定吧。

一定一定要緊記的是，金額最好最好能夠一視同仁，最怕是有小朋友當眾拆利市，發現彼此金額唔同，踢爆你偏心就大鑊。

3. 金額勿高於上司

辦公室派利市更是門高深的學問，銀碼太細難免會被「口舌怪」到處唱你孤寒，隨時講足幾年。

嫻姐多年來堅守的原則是，利市金額銀碼切忌高於上司，可以上司包幾多你包幾多，可以少過上司，此做法絕對一石二鳥，一來不用得罪上司，二來不會被同事笑話。

除了親戚朋友、未婚同事外，嫻姐提醒大家，咪漏咗以下呢三個人啊！

4. 秘書

秘書是公司的順風耳，也是千里眼，她們潛伏在各大高層的身邊，經常第一時間收到各方消息，不論裁員、升職等八卦，甚至各項申請、表格領取等公事，都能予以你方便，呢封利市唔少得。

5. 停車場保安

嫻姐唔係車主，但都略有所聞。每逢新年爽手點給封利市給停車場保安，當你車頭燈、車窗無關好，佢肯定會快速致電提醒你，免卻煩惱，呢封「利市」絕對是花得值。

6. 屋苑保安

屋苑保安每天都會見到，固然見到不派利市會好尷尬，嫻姐建議大家要派封大利市畀各個保安，點解？好簡單，當你外出購物後兩手重擔出現在門口，保安總會識做地行個方便幫你開門，1年有365日，絕對抵派！

「利市」代表的是好彩頭，禮多禮少皆不怪罪。過了初一、二、三，但未過正月，「利市」都要記得袋定幾封，有所準備。

撰文：都市嫻情

嫻姐，80後職場師奶，兼職返工，正職做「阿四」，陪皇帝仔吃喝玩樂，最叻計婆仔數，平日嗜好就是捐窿捐罅搵著數，有着數記得預埋我！